Asier telebistan ezagutu genuen. Zehazki, ETBko Esto no es normal saioan. Aldagelan arropa aldatu zuen eta… «Uau! Aizu, saio dotore bat egiteko gogoa duzu?». Berehala esan zuen baietz, eta estudioan geratu ginen handik aste pare batera.

Saioaren aurreko gauean WhatsApp bat bidali genion ordutegiak eta horrelakoak gogorarazteko, eta ea depilatu zen galdetu genion. Ezetz, beraz, labana hartu eta dena pasatu zuen. Dena. Jajaja.

Maleta pare bat ekarri zituen era guztietako arropekin. Kirol asko egiten du eta proba espartanoetan parte hartzen du, sokatik zintzilikatu, lokatzetan bota edo gurpil bat bultzatzen duten horietakoak. Alegia, gorputz ederra du, eta luzerako.

Saioa berotze pixka batekin hasi genuen, arropa kasualarekin eta zertxobait formalagoarekin. Modelo gisa edo higiezinen salmentako profesional gisa (hori baita, egiatan, bere lanbidea) portfolio baterako balio ziezazkioketen argazkiak. Gero jeans estilora pasatu ginen, eta ondoren kirol-arropara. Honekin denbora dezente egon ginen, gorputzean olio bat eman geniolako izerdi-itxura emateko, argiak pixka bat aldatu genituen, ke pixka bat sartu genuen… tira, beste giro bat guztiz. TRX txiki bat eta mankuernaren bat prestatuta genituen, giharrak puztu eta ikusgarri ager zedin.

Eta amaitzeko, biluzi-argazki batzuk egin genituen. Agurtzane gelatik ateratzea nahiago zuen galdetu genion, baina ezetz esan zuen, ez zitzaiola axola. Beraz, beste atzealde bat prestatu eta oso jarrera desberdinak probatu genituen. Batez ere gorputzaren silueta, zainen testura eta gihar markatuak ikusten ziren jarrerak… baita akrobazia txikiren bat ere. Hemen zuri-beltzeko argazkiren batekin jolastu genuen, ia kontrara jarritako zenit-argiekin eta kontraste handiarekin.

Egia esan, oso harro gaude saio honekin. Asier oso atsegina eta jatorra izan zen, eta joku handia eman zigun. Eskerrik asko Asier!